الإيمان بالدور التونسي الفاعل في الصراعات العالمية

الإيمان بالدور التونسي الفاعل في الصراعات العالمية

– البارح عديت ليلة نتابع في الاخبار العالمية و الإقليمية، هذا اش لقيت؟ :

1. صراع حاد امريكي -صيني اقتصادي وعسكري و سياسي .فما تنافس حقيقي على النفوذ السياسي في العالم. الصين قوة عالمية جديدة بدات تظغط على اقوى دولة في العالم بش تخليلها بلاصة محترمة. طرح ممتاز يستحق الفرجة والمتابعة و التحليل.

2. بحذانا هنا طريح آخر ممتاز .صراع حاد علخر في ليبيا بين 3 محاور: بين التركي/القطري وبين الإماراتي/السعودي/المصري/الفرنسي وبين الروسي/السوري/الايراني. حرب حقيقية مشتعلة في الميدان و في الاعلام. رهانات سياسية واقتصادية و فكرية محطوطة و امتدادات الصراع تمس الوضع في سوريا واليمن و حتى اثيوبيا.

3. الإمارات العربية المتحدة عندها مشروع نووي سلمي و شرات مفاعلات من كوريا الجنوبية .قضية قلقلت مليح قطر الي بدات في حملة اعلامية مضادة .سمعت قبل انو الامارات اطلقت قمر صناعي.

4. توتر عملاق بين الصين و الهند، المناوشات لخرانية ماتو فيها 20 هنداوي .الزوز دول نووية و قوى اقتصادية .صراع مربوط بالقوى الخارجية أمريكية و روسية و عندو جذور ترجع لأواخر الأربعينات و يمس علخر في الصراع الهندي/الباكستاني و الصراع الروسي/الصيني.

– في العالم بالمشطة صراعات، منافسات، حروب، مواجهات. العالم يتحرك و كل أمة حية تلوج على بلاصة تحت الشمس .الملعب العالمي فيه صراعات بالمشطة على المواقع .فما حياة سياسية كاملة ثرية علخر منوعة متغيرة و تتخلق كل يوم و كل ثانية أصلا.

– انا نتفرج جا لبالي سؤال وحيد اوحد ” ويني تونس في كل هاذا” .بالرسمي في وسط هاذا العالم شنوة هو دورنا بالظبط ؟؟؟ شنوة هوا موقعنا ؟؟؟ وين نحبو نقعدو ؟؟

– العقل السياسي الفايق الحي الناشط لازمو يطرح هذه الأسئلة المصيرية و الوجودية برسمي .هذا هو سؤال الهوية التونسية الحقيقي كان جينا ندركو بالرسمي المعنى السياسي للهوية.

– كيف ندور الفايسبوك، القنوات التونسية، منشورات الاحزاب و الفكر السياسي التونسي الحالي .نلقاه جانبي وهامشي و مستكين علخر و مرتاح في دور الفرجة والتعليق و الاصطفاف وراء إحدى القوى/المحاور الأجنبية.

– ليبيا جارتنا وأختنا إن جاز التعبير، تي مجالنا الحيوي و أمننا القومي مربوط بيها علخر .ليبيا تتقاتل عليها الذيوبة و أحنا فرايجية علخر و الكارثي انو العقل السياسي الحالي يرفض تماما أي عملية تفكير في التدخل اي تدخل كان اللهم الا التدخل بالحسنى و الدعوة للحوار و الوحدة الوطنية و رفض التدخلات الأجنبية.

– ليس لتونس أي طموح أجنبي أو أي طموح عالمي أو أي مسعى لتبديل هذا يصطدم بكل أنواع الحجج المحبطة و المحطمة واليائسة.

– القومية التونسية جات باش تبدل هذا. القومية التونسية ثورة كاملة جذرية و شاملة على الدور الفرايجي في السياسة العالمية .القومية التونسية تؤمن انو تونس لازمها تكون حاضرة و فاعلة عالميا وعلقد متنجم و انو الفكر السياسي التونسي لازمو يهتم علخر بالسياسية العالمية ويفهمها، يدرسها، يحللها و ينظر للموقع التونسي المستقبلي فيها.

– المعهد التونسي للدراسات الإستراتيجية الي هو مؤسسة عمومية تتبع رئاسة الجمهورية ملي تكون لحد يوم الناس هذا ماعمل حتى ربع دراسة على السياسية العالمية و على الموقع التونسي المستقبلي.

– التيارات الفكرية-السياسية بكلها على بعضها ولا واحد منهم أصدر دراسة حول الموقع و الدور العالمي الي لازم تاخذو تونس مستقبلا اللهم إلا الدور التقليدي العهري بتع “واحة الأمن والسلام و الحوار “

– فما ملعب سياسي/عسكري عالمي. من أول التاريخ من أول مابدات تتكون الدول تأسس هذا الملعب. فما بطولة سياسية/عسكرية عالمية كل مرة يهزها واحد .الدول في هذا العالم تنقسم بين الدول اللاعبة و الدول المتفرجة /المعلقة/النبارة .

– الدول اللاعبة تصنع التاريخ بالباهي و الخايب .تنحت إسمها و تحقق قدر من العظمة و المجد على حسب عبقريتها و قوتها الروحية.

– الدول المتفرجة تخضع لصانعي التاريخ و تاخو مهام القهواجي او النادل او المفعول فيه و بيه.

– النخبة السياسية التقليدية و الفكر السياسي التونسي السائد تعود و أصلا ارتاح لدور الفرجة و الخضوع و هوكا يكور في تونس لحساب القوى الأجنبية.

– القومية التونسية ترفض الوضعية السلبية الخاضعة و تتطمح للوضع الإيجابي الفاعل مهما كانت المخاطرة الناتجة عليه. بالنسبة للقومية التونسية الأمم المتفرجة لا تستحق الحياة و الوجود أصلا. بالنسبة للقومية التونسية الضعف هو عيب و انحطاط روحي و عار أبدى.

– بالنسبة للقومية التونسية فإن الأمة عليها استحقاق الوجود بفعلها الذاتي و بمواجهتها لباقي القوى العالمية. بالسنبة للقومية التونسية الأمة لازمها واجبها انو يكون عندها دور ايجابي فاعل و حاسم. دور إيجابي يعني فرض موقف وفرض مصالح وفرض قيم و فرض مجال نفوذ. بالنسبة للقومية التونسية تونس لازمها تكون مصارعة هي زادا لازمها تكون محاربة و لازمها تفك موقع وبلاصة تحت الشمس كيفها كيف باقي الأمم الحية.

Hits: 70

تبعنا على صفحة فايسبوك "القومية التونسية"
ساهم في نشر الوعي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *