الفساد التونسي يناور #مانيش_مسامح

الفساد التونسي يناور #مانيش_مسامح

 ـــ في تمبك حملة : مانيش مسامح ، كان المجلس ناوي يناقش “قانون المصالحة” في لجنة التشريع العام . وقتها تنظمت بالمناسبة وقفة قدام المجلس آخي شيصير : تتأجل الجلسة لجمعة من بعد و كيف كيف تتبرمج  وقفة احتجاج  و تتأجل  الجلسة  و هكاكا بقات جلسات نقاش مشروع قانون المصالحة الاقتصادية” تتأجل  جمعة  ورا  جمعة  .

ــــــ  حملة #الرخ_لا  رغم هدفها  الاجتماعي البحت  فانها رجعت اثارت قضية  البترول و الثروات الباطنية  : غاز ،ملح …. تحت ظغط الحس و رغم انو  القانون  ميجبرهاش على  نشر العقود فانو  وزارة الطاقة” نشرت جزء كبير من  عقود المحروقات : بترول و غاز بنسخها الاصلية ( سكانار) و لكن لكن كبيرة جدا : عقود  شال خصوصا  حقل ميسكار الغازي  موقعش نشرها !!!! .

ـــــ نيزدو  #الرخ_لا  عاودت رجعت التساؤلات حول  حقيقة الثروات الباطنية  ،  عقود الاستغلال  و  الفساد في قطاع الطاقة  و كانت ممكن تتوسع المسائل حول :  عقود الملح  ، المعاهدات الدولة  و  الفساد  بكلو لكن  الحكومة  رغم كل تهديداتها رجعت  رشات المعتصمين  : بالتشغيل ل4000 شاب!!! +صندوق تنمية خاص بتطاوين  ب80 مليار . المهم تسكت  تطاوين و يتسكر  الدوسي .

ــــ الي نلاحظوه لهنا انو  قانون المصالحة ماتسحبش و انما يتأجل كهو للوقت الباهي  ، دوسي الثروات  متحلش ابدا و انما يتسكر باي سوم كان المهم ميتكشف فيه شي حقيق ،مخطر و غالط .

ـــ في المرحلة هاذي وين : الفايسبوك  + حملات الشارع  + وسايل اعلام  + جمعيات + صحافيين  ركزو على  الفساد  لدرجة انو  الراي العام  تحسس و ولا يتكلم و ممكن يتحرك فالفساد التونسي  حس بالخطر و قرر انو   يعمل مناورة  :

ـــ 1. تراجع محسوب تكتيكي يحسس  الشعب  انو  الحكومة  تقاوم فيه و يجلبلها تعاطف و ممكن يجيبلها  ثقة شعبية.
ــــ 2. يسكت كل  الاحتجاجات الاجتماعية الخطيرة  مهما كان  السوم  : فلوس رغم انو وضع البضلاد المالي متدهور.
ـــ 3. يضحي ببرشا فاسدين  صغار  و  مفضوحين علخر  باش يعمل  حس كبير
ـــ4. يصنع تهم  مفتعلة  و  غالطة  الفاسدين مشهورين  باش تظهر  الحكومة بطلة  و في نفس الوقت تكون تهم  مفيهاش فساد  :تٱمر على امن الدولة كهو : كيما صار مع  اعوان بن علي  و بعد اعوام يخرجو  عدم سماع الدعوى  .
ـــــ 5. يحاول ديما يدفع الراي العام لقضايا تافهة  : جنسية  و دينية  تلهيه تماما و ترجعلنا  عرك سرادك الهوية بتع 2011  و عندو هنا وسايل اعلام قوية برشا : اشهرهم  قناة الحوار التونسي  + قناة نسمة.
ـــــ 6. يتهم منظمي  حملة مانيش مسامح  بالعمالة !!!!!! و يحاول يمسخ كل التحركات
ـــــ 7. يصبر علخر لين الوقت يقلق  المناضلين  : صيف ،رمضان ،بحر ،شيخات ،دخول مكتب يعني وين تجي  اولويات جديدة  قدام  الوعي التونسي  تخليه ينسا  حكاية الفساد  و يتلها بحياتو  الفردية.
==> بالظبط  الفساد التونسي  يتراجع شوية لتالي ،يميل لليمين ،يميل لليسار ،يحاول يقدم و يتراجع فيسع ،يلعب على الوقت ،يحسب روحو ضعيف ،يوهمنا بانتصارات كبيرة بش نترخفو لين يجي  وقت الضربات القوية  وقتلي نبدو : تاعبين ،مش لاهين ، مركزين في موضوع ٱخر و يائسين.

ملاحظة: هذه المقالة تمت صياغتها في شهر جوان 2017 .

Hits: 38

تبعنا على صفحة فايسبوك "القومية التونسية"
ساهم في نشر الوعي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *