الموقف التونسي في أزمة الخليج

الموقف التونسي في أزمة الخليج

حول اتخاذ المواقف السياسية :

* مثال تطبيقي : الموقف التونسي في الصراع السعودي القطري *

( اطلع على الجزء الأول http://www.alomma.tn/?p=55 )

 

 

 ** الجزء الثاني : الموقف التونسي في ازمة الخليج **

 

*2 ازمة الخليج و الموقف التونسي : شنجمو نعملو حاليا ؟؟؟

ـــ شعندنا تو في النازلة الخليجية : مقاطعة دول :السعودية ،مصر ،الامارات +شطر اليمن+شطر ليبيا +جزر المالديف لقطر بمباركة امريكية او حث امريكي .
ــــ في تونس عندنا نوعين :
1- اتباع قطر : ديراكت تضامنو معاها و حسو بالتهديد لنهم يعتبروها ممولهم الاول و نصيرهم الاول  زادا . و زادا الي يعتبروها مع قناتها الجزيرة : داعمين للثورة و التحول الديمقارطي التونسي.
2- اتباع الامارات : هاذم معادين تماما لاتباع قطر : معادين اساسا للنهضاويين و فيهم شكونو معادي للثورة  بيدها و يراو انو قطر عدوة و الامارات حليفة لنها دعمتهم بلفلوس علخر ايامات الصراع المطلق : 2012 ـــ 2013 ـــ 2014.

ــــ و الزوز تو رجعو للسب : خوانجية ، ارهاب ، عروبة ،عمالة ، امريكا ، صهيونية ، وطنية ، حداثة ، اخونة ، اسلام….
ــ لكن الراي العام التونسي و ممكن حتا حكومتو يميلو لوضع الحياد التقليدي على اساس : التقليد التونسي ، التضامن العربي الاسلامي ، الخوف من التدخل .
ـــ للاجابة على سؤال :شنوة لازم تعمل تونس ؟؟
لازم نفهمو قبل :

 

*2.أ : الوضع الحقيقي :

ــ لنا مفم شي واضح : مهوش مفهوم السبب الرئيسي للمقاطعة التامة خصوصا من جانب السعودية و لاهو مفهوم زادا الموقف الامريكي .

ــ اذا كنا انجمو نفسرو الموقف الاماراتي بعدائها للخوانجية الي ولا هوس مرضي و انجمو نفترضو انها ترا فيهم تهديد ل: نمط حياتها ، لقيم تتبناهم ، لمشروع حضاري تروجلو => انجمو نلقو شرعية لموقف الامارات .

ــــ الموقف السعودي مهوش مفهوم مهما كانت المبررات : ارهاب !!! ( شي يظحك) ، دعم تنظيمات اسلامية ( شي يظحك ) ، علاقات مع ايران ( و الامارات ،الكويت ، عمان كلهم بعلاقاتهم و ممكن الممتازة مع ايران ) ، رفض دفعان فلوس لاماريكا : مفم شي : اصلا هوما مجرد وعود شراء و من عهد اوباما !!!! و وعود سعودية كهو .
ــ الموقف المصري مفهوم علخر :ضد الخوانجية +طمع في فلوس السعودية ، موقف شطر اليمن+شطر ليبيا +جزر المالديف ميتحبوش لنهم لا يضرو لا ينفعو تويكا .

ــ مقاطعة قطر اضرارها خفيفة و ممكن ضئيلة : قطر عندها برشا فلوس و تنجم تشري منين تحب سلعها و اصلا تو ايران :حلتلها بابها .

ـ مقاطعة قطر بش ترميها في حضن ايران =>  زيادة نفوذ ايران => احتمال قيام تحالف :ايراني ،تركي ،قطري بش يكون مؤثر في العراق + سوريا علخر => و هذه ضربة قوية للسعودية و امريكا .

ـــ مقاطعة قطر تنجم بسهولة تخليها مع تحسين العلاقات مع روسيا و هكا يولي مشروع تحالف كبير : قطر ،ايران،تركيا +روسيا => يتدخل في العراق + سوريا و ممكن لبنان و يولي عندو دور كبير في القضية الفسلطينية => ضررعملاق لدور امريكا في الشرق الاوسط .

ـــ مقاطعة قطر تزيد في توتر المنطقة و تنجم تبدل كل التحالفات :الاقتصادية ، العسكرية و السياسية و تعمل تغييرات تضر تماما بالمصالح الامريكية و لهنا يجي السؤال : ماهي المصلحة الامريكية في مقاطعة قطر ؟؟؟

ــ لازم نوضحو انو قطر هيا حليفة لاماريكا و فيها زوز قواعد عسكرية امريكية : استقبلتهم بارادتها و لهنا كيفاش امريكا تخاطر بتوتير العلاقات مع قطر الي ممكن تخرجلها القواعد و ترد الفعل : باستدعاء قواعد عسكرية روسية !!!!! => زيادة عملاقة في توتير و تفرعيس الوضع !!!!.

 

ـــ قطر مع تحالف ايراني تنجم اتعب السعودية و تهيج عليها قناة الجزيرة :الحريات +الشيعة +الصوفية+فساد العايلة المالكة+ +++ تنجم تحضن و تدعم المعارضة السعودية .
ــ السعودية اعلان عدائها مع قطر فانها تحل الباب قدام :المؤامرات المضادة : زوز انظمة ملكية ،اطماع امراء في الحكم ، اتصالات بامراء + قادة عسكريين + محاولات انقلاب : السعودية فيها اشكال وين الملك سلمان يحب يحط ولدو كولي عهد و يكسر قاعدة الكابر فالكابر .و هذا ماصار فعلا و عين ولدو ولي عهد.
ــ قطر تنجم اتطرد الخدامة المصارى و تزيد الظغط الاجتماعي/السياسي على مصر و تقلقها علخر و توتر الوضع فيهآ :احتمال ثورة ،تمرد …
ـــ لكل هاته الاسباب فانو الوضع مغيم و لذا فانو الحكمة تقول نفهمو قبل من حلو افامنا و ناخذو المواقف.

 

*2ب : الدوافع القيمية حسب الفكر السايد:

ــ الفكر السياسي التونسي السايد ديراكت ياخو مواقف و على اساس قيمي زادا و يضرب عليها بالبونية . و لذا خنشوفوهم :
ــ قطر وقفت مع تونس : عطاتنا فلوس لازم ندعموها :رجولية
ــ قطر وقفت مع الديمقراطية و الحرية لازم ندعموها : ديمقراطية ،حرية و حقوق انسان
ــــ  قطر تدعم في حماس : تدعم في فلسطين لازم ندعموها : اسلام +عروبة
ــــ قطر تدعم في الاسلاميين لازم نجيو ضدها : نمط !!!!!
ــ قطر حليفة لامريكا لازم نجيو ضدها :عروبة
ــ قطر تدعم في الارهاب لازم نجيو ضدها : انسانية !!!
ــ قطر تدعم في الاسلاميين الي هوما عملاء و ضد النمط التونسي لازم نجيو ضدها :وطنية.

 

*2ج :المصلحة التونسية :

ــ حقيقة تونس معندها حتا مصلحة كبرى مهما كانت :
ــ لا السعودية ،قطر ،الامارات ماهي بش تولي سوق منتوجات تونسية !!!! عنا منافسين قويين :جودة و اسعار يعني امكانات اقتصادية لا .
ــــ لا السعودية ،قطر ،الامارات ماهو بش يعمل استثمارات انتاجية :فلاحة ،صناعة ،بنية تحتية ، مياه ،طاقة … ( استثناء وحيد مصفاة الصخيرة الي عند القطريين اما مزالت واحلة الحكاية ) لنو راس المال الخليجي يميل لالعقارات ،البنوك ،التجارة ،الخدمات ،السمسرة : ربح سريع و باقل مخاطرة .
ـــ تونس لاهي بش تتقدم :علميا ، تقنيا ، عسكريا و لا سياسيا كيف تدخل في اي حلف : بش يوكن دورها تابع لذا فا مفم شي .
ــ عمليا اقصى ما تحلم بيه تونس في هاذا الوضع انو الطرفين يحاولو يشريو موقفها بشوية فلوس او زيادة عدد التونسيين الخدامة عندهم كيما في حال طرد الخدامة المصريين من قطر => اقصى متنجم تونس تاخوه في حالة بيع موقفها : فلوس+ تشغيل
ـــ اما مقابل فلوس + تشغيل فانها تدخل في صراع كبيرو عملاق اكبر من قدراتها الحالية و في وضع سياسي/اقتصادي/اجتماعي هش معناها الطرف الي بش تعاديه ينجم يعمللها مشاكل هيا في غنا عنهم حاليا .
لنا مالا لازم نشوفو حجم الضرر :

 

*2د: الوضع التونسي :الظغوط الخارجية:

ــ من شيرة اخرى نجيو نلقو تونس تحت الظغوط :
ــــ 1. عندها توانسة  في قطر
ـــ 2. توانسة في الامارات
ـــ 3. توانسة في السعودية
ــــ 4. شوية صادرات للبلدان اذيكا
ـــ هاذم العوامل الي يكونو الظغط على تونس : تخاف انو الطرف الي بش تجي ضدو يطرد الخدامة التونسيين + يسكر سوقو تجاه منتوجاتنا
=>  تونس هكا تخاف من طرد عشرات الالاف من مواطنيها +خساير عشرات المليارات من المليمات : عمليا ايام الحرب الليبية روحو لتونس عشرات الالاف معناها مهوش شي جديد و السوق الخليجية بكلها ضئيلة الحجم في تجارتنا قدام :اوروبا +لبيا+دزاير
=>  الضرر الي بش يصيرلنا في حالة  جينا مع طرف مهوش باش يكون كبير اقتصاديا/اجتماعيا .
ـــ اما تونس تنجم زادا تصير عليها ظغوط امريكية
ــ تنجم زادا تصير عمليات ارهابية كبيرة :تهدد امن الدولة باش تدفع الحكومة انها تاخو موقف : لهنا عنا شكوك كبرى في دور الامراتيين في الارهاب خصوصا في تفرقيع كار الامن الرئاسي و للنا الحكومة التونسية تخاف علخر علخر .
ــ تونس  في وضعها الحالي وين العصابات تحكم والقضاء عاجز و الفساد مستشري و سفير فرانسا يتدخل : فانو اي تهديد ارهابي ،امريكي ،اماراتي ينجم يخوف الحكومة .
ــ في وضع تونس الحالي وين فما اشكال امني عملاق : شكوك في تواطئ و عمالة اطارات كبرى ، شكوك في تدخلات اجنبية في علاقة بالارهاب .
ــ في وضع تونس الحالي وين جزء من الاحزاب الكبرى تمويلو اجنبي : و بالذات من طرفي النزاع : قطر أو الامارات .. فانو الانحياز لجنب ينجم يجيب توتر داخلي عملاق بما فيه وسط الحكومة.
ـــ الانحياز لطرف ينجم يؤدي لصراع استئصالي نتايجو تنجم تكون مفاجئة امنيا و تهدد وجود الدولة في وقت حساس علخر :اعتصام الكامور و امتداداتو ، فدة شعبية عامة ، قلق من استشراء الفساد ، و زوال الخوف القديم من البوليس.

 

*2ه :القدرات التونسية :

ـــ القدرات التونسية : تونس حاليا متنجم تزيد شي لأي طرف : معندها ماتزيد او تقدم لاي حلف شتدخل فيه . معناها تونس تنجم كان :
ــــ 1. تقعد ساكتة
ـــ 2. تدخل بالحسنى : دبلوماسية جبر الخواطر.

 

*2و :الممكن التونسي الاقصى :

ـــ الممكن التونسي الاقصى هوا في احتمال وحيد : الاكثر ربحية : قطر تقرر الهجوم بكل قوتها : تطرد خدامة مصر و تعوضهم بتونسيين مقابل دعم تونس الدبلوماسي او الخطابي و تعلن استعدادها : تشغيل توانسة الامارات + توانسة السعودية في صورة طردهم مع تنازلها على الديون التونسية : هاذا اقصى ربح تنجم تجنيه تونس لكن :
ــ ما فما حتى سبب مربح من شيرة قطر بجيبان دعم تونسي كلامي ليها الا اذا كانت تحب تعاقب مصر . بش نكونو صريحين تونس بنسبة لقطر ،السعودية ،تركيا ،الامارات هيا : دولة متسولة تاخو مساعدات و ليس لها معنى كبير دبلوماسيا .
ـــ معناها هنا لازم نتعلمو من درس سوريا : قصينا معاها العلاقات لاسباب غبية و انتهازية و مربحنا شي لا من الامارات و لا السعودية .
ــــ حاليا الممكن التونسي هوا : اننا نحاولو نكونو محترمين و ما نطيحوش قدرنا و نتقواو شوية و نصمدو قدام الضغوط الخارجية اولا و ثانيا نرجعو العلاقات مع سوريا لنهاية كل اسباب قصانها .

 

Hits: 212

تبعنا على صفحة فايسبوك "القومية التونسية"
ساهم في نشر الوعي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *